EHF fundar í kvöld vegna Rússa

Framkvæmdastjórn Handknattleikssambands Evrópu, EHF, kemur saman í kvöld til aukafundar til að ráða ráðum sínum vegna tilmæla sem Alþjóða Ólympíunefndin, IOC, sendi frá sér í morgun. Í þeim mælir IOC með því að Rússar og Hvít-Rússar verði útilokaðir frá allri alþjóðlegri íþróttakeppni.

Á fundinum hjá EHF í kvöld verður farið yfir næstu skref en þegar hefur leikjum landsliða og félagsliða frá Rússlandi og Hvíta-Rússlandi sem fram eiga að fara í þessari viku verið frestað. Í þessari viku stendur m.a. yfir undankeppni Evrópumóts kvenna í handknatteik auk leikja í Meistaradeild Evrópu í karlaflokki.

Þótt það komi ekki fram í tilkynningu EHF í dag þá verður sennilegt að telja að rædd verði fjárhagsleg tengsl EHF við rússnesk fyrirtæki en m.a. ber Meistaradeild kvenna nafn rússnesks fyrirtækis sem er í eigu forseta rússneska handknattleikssambandsins.