„Úr því sem komið var þá er kannski allt í lagi að tapa á móti þessu liði með fjögurra marka mun en mér finnst við eiga helling inni,“ sagði Díana Dögg Magnúsdóttir landsliðskona í handknattleik þegar handbolti.is hitti hana á Ásvöllum eftir fjögurra marka íslenska landsliðsins fyrir ungverska landsliðinu í fyrri viðureign liðanna í umspili um HM-sæti í dag, 25:21.
Um tíma eftir miðjan síðari hálfleik var íslenska liðið átta mörkum undir, 20:12, og stefndi í stórt tap. Sú varð ekki raunin og niðurstaðan er fjögurra marka tap sem íslenska liðið tekur með sér til Ungverjalands þar sem síðari viðureignin fer fram á miðvikudaginn.
„Leikurinn var nokkuð stirður á kafla, ekki síst framan af síðari hálfleik. Á sama tíma fengum við á okkur nokkur einföld mörk og vorum komnar í slæma stöðu. Okkur tókst að vinna aðeins upp með bættum varnarleik og að laga aðeins sóknarleikinn sem er þó jákvætt,“ sagði Díana Dögg sem tók talsvert þátt í leiknum, ekki síst í vörninni.
„Leikur ungverska landsliðsins er líkur þeim sem ég kannast við frá Þýskalandi. Ég reyndi að nýta mér það, jafnt í vörn sem sókn, en hefði kannski getað gert enn betur,“ sagði Díana Dögg sem leikur dagsdaglega með þýska 1. deildarliðinu BSV Sachsen Zwickau.
Þetta er ekki búið
Framundan er síðari leikurinn við Ungverja ytra á miðvikudaginn. Díana Dögg segir ekki koma til greina að leggja árar í bát.
„Þetta er ekki búið. Fjögurra marka munur er ekki stórkostlegur munur í handbolta, eins og við þekkjum. Annað væri upp á teningnum ef við færum sex til átta mörkum undir.
Það er allt hægt í þessari stöðu en ljóst þó að við verðum að eiga toppleik til að eiga möguleika á að snúa taflinu við. Við megum alls ekki detta niður í jafn langan tíma og við gerðum að þessu sinni ef við ætlum okkur að velgja Ungverjunum undir uggum,“ sagði Díana Dögg Magnúsdóttir landsliðskona í samtali við handbolta.is.
