Kvennalið Vals í handknattleik hefur orðið fyrir annarri blóðtöku á skömmum tíma. Ein reynslumesta handknattleikskona landsins, Arna Sif Pálsdóttir, leikur ekki með liðinu fyrr en í janúar eða jafnvel getur það dregist fram í febrúar að hún birtist á handboltavellinum á nýjan leik.
Þetta staðfesti Ágúst Þór Jóhannsson, þjálfari Vals, í samtali við handbolta.is í dag. „Arna hefur lengi glímt við meiðsli í hné, meðal annars í allan fyrravetur. Henni hefur ekki tekist að ná sér góðri. Þess vegna er það eina í stöðunni að hún taki sér hvíld frá handbolta næstu mánuðina til að jafna sig,“ sagði Ágúst Þór og bætti við.
„Þetta er auðvitað mikil blóðtaka fyrir okkur enda er Arna Sif önnur landsleikjahæsta handknattleikskona Íslands frá upphafi, þrautreynd atvinnkona í boltanum og kjölfesta í okkar liði, jafnt utan vallar sem innan.“
Fyrir utan Örnu Sif þá sleit Ragnheiður Sveinsdóttir krossband í hné rétt áður en keppni á Íslandsmótinu hófst í byrjun september. „Við erum þar með án tveggja mjög sterkra línu- og varnarmanna,“ sagði Ágúst Þór sem hefur í mörg horn að líta um þessar mundir þótt hlé sé á keppni í Olísdeildinni fram í lok næstu viku.
