„Það var margt gott og og einnig margt sem þarf að laga,“ sagði Einar Andri Einarsson annar þjálfara U20 ára landsliðs karla í samtali við handbolta.is í Lasko í Slóveníu í dag spurður hvort vel hafi verið farið yfir tapleikinn við Svía og hann gerður upp með leikmönnum landsliðsins. Íslensku piltarnir töpuðu með 10 marka mun, 33:23, gegn Svíum en komust engu að síður í átta liða úrslit Evrópumótsins. Þökk sé stórum sigrum á Úkraínumönnum og Pólverjum fyrr í mótinu.
Íslenska liðið getur ekki þolað annað skipbrot gegn Portúgal á morgun í upphafsleik átta liða úrslita Evrópumótsins. Þess vegna er nauðsynlegt að daga lærdóm af viðureigninni við Svía.
Einar Andri sagði það gleðiefni að íslenska liðið sé komið í átta liða úrslit á EM og hafi nú þegar tryggt sér sæti á heimsmeistaramótinu sem fram fer á næsta ári. Eitt markmiðanna sé þar með í höfn.
„Menn fögnuðu á hótelinu þegar sæti í átta liða úrslitum var í höfn. Við sátum aðeins lengur í matsalnum,“ svarði Einar Andri spurður um viðbrögð leikmanna.
„Stóra markmiðið fyrir EM var að tryggja liðinu þátttökurétt á HM 21 árs landsliða á næsta ári. Það var svo sannarlega verðugt verkefni enda er Evrópumótið mjög sterkt mót. Mörgu var því fagnað í gær,“ sagði Einar Andri Einarsson annar þjálfara U20 ára landsliðs karla í samtali við handbolta.is í Lasko í Slóveníu í dag.
Talsvert lengra myndskeiðsviðtal er við Einar Andra efst í fréttinni.
Leikir Íslands í milliriðlakeppni átta liða úrslita:
Portúgal - Ísland, 15. júlí kl. 12.20
Ísland - Austurríki, 16. júlí, kl. 10.
Spánn - Ísland, 18. júlí, kl. 12.20.
- Allir leiktímar eru miðaðir við tímann á Íslandi.
Viðureign Íslands og Portúgals hefst klukkan 12.20 á morgun. Handbolti.is er í Slóveníu og fylgir landsliðinu eftir mótið á enda. Beint textalýsingu verður úr Zlatorog Arena í Celje auk þess sem viðtöl verða við leikmenn og þjálfara.
EMU20 karla: Leikir, úrslit og staðan, riðlakeppni
