Einar Bragi Aðalsteinsson og liðsfélagar í IFK Kristianstad endurnýjuðu kynnin við efsta sæti sænsku úrvalsdeildarinnar þegar þeir sóttu IF Hallby HK heim og unnu með fimm marka mun, 35:30. Einar Bragi skoraði þrjú mörk í sex skotum og gaf einnig þrjár stoðsendingar á samherja sína sem báru ávöxt.
IFK Kristianstad hefur þar með 26 stig eftir 16 leiki eins og Malmö sem lagði Helsingborg í kvöld, 37:27. IFK stendur betur að vígi hvað efsta sætið varðar í keppninni við Malmö vegna sigurs í innbyrðis viðureign.
Ekki gekk eins vel hjá liði Arnórs Viðarssonar, HF Karlskrona, sem tapaði fyrir Alingsås á útivelli, 27:25.
Arnór skoraði fjögur mörk úr sex skotum. Karlskrona heldur áttunda sæti deildarinnar þrátt fyrir tapið með 15 stig eftir 16 leiki.
Fyrr í dag vann IK Sävehof með Birgi Stein Jónsson innanborðs viðureign sína gegn VästeråsIrsta HF.
