Einar Bragi Aðalsteinsson og liðsfélagar í IFK Kristianstad sitja einir í efsta sæti sænsku úrvalsdeildarinnar í árslok. Þeir lögðu Alingsås HK, 29:24, á heimavelli í kvöld. Fyrir vikið er IFK Kristianstad á toppnum með 28 stig þegar 17 leikir eru að baki. Liðið er stigi fyrir ofan Malmö sem gerði jafntefli við Hammarby í kvöld, 31:31. Hammarby er í 3. sæti með 26 stig en hefur leikið 18 leiki. IK Sävehof, Birgir Steinn Jónsson, leikur með, er í fjórða sæti með 23 stig að loknum 18 leikjum.
IK Sävehof lagði meistara síðasta tímabils, Ystads IF, 28:27, á útivelli í kvöld, 28:27. Birgir Steinn skoraði tvö mörk í þremur skotum.
Einar Bragi skoraði fjögur mörk í sex skotum í sigurleik IFK Kristianstad. Athygli vekur að aðeins 10 leikmenn, að markvörðum meðtöldum, voru á leikskýrslu hjá Kristianstad.
Skoraði eitt mark
Í úrvalsdeild kvenna fagnaði Lena Margrét Valdimarsdóttir sigri með samherjum sínum í meistaraliðinu Skara HF, 26:23, á útivelli gegn Skövde HF. Lena Margrét skoraði eitt mark en hitt markskot hennar í leiknum missti marks.
Skara HF er í 3. sæti með 16 stig eftir 11 leiki, er fjórum stigum á eftir IK Sävehof sem lagði Kungälvs í gær.
Kom ekki við sögu
Í Allsvenskan, næsta efstu deild, tapaði Vinslövs HK sem Dagur Sverrir Kristjánsson leikur með, fyrir HK Aranäs, 27:26, í spennandi leik á útivelli. Vinslövs HK er sem fyrr næst neðst með fjögur stig eftir 15 leiki, fimm stigum á eftir hinu sögufræga liði Drott sem er næst fyrir ofan. Lið Enköping virðist heillum horfið á botninum án stiga.
Eggert Sverrir var ekki í leikmannahópi Vinslövs HK í kvöld.
