Einar Þorsteinn Ólafsson æfði ekkert með íslenska landsliðinu í handknattleik karla í Kristianstad í dag. Ekki er útlit fyrir að hann verði klár í slaginn gegn Pólverjum á morgun. Einar Þorsteinn veiktist í fyrrakvöld og hefur verið settur í einsmannsherbergi til þess að komast hjá því að smita aðra í íslenska hópnum á Evrópumótinu. Einar Þorsteinn er með flensu og hita.
„Einar var bara alls ekki nógu góður í morgun. Ég reikna þar af leiðandi ekki með honum alveg strax,“ sagði Snorri Steinn Guðjónsson þegar handbolti.is hitti hann að máli áður en æfing landsliðsins í Kristianstad Arena hófst upp úr hádeginu í gær.
Útlit er fyrir að sömu 16 leikmenn mæti í leikinn við Pólverja á morgun og tóku þátt í viðureigninni við Ítalíu í gærkvöld.
Fyrir utan Einar Þorstein er ágætt ástand á leikmannahópnum, að sögn Snorra Steins.
Áfram utan liðsins
Þorsteinn Leó Gunnarsson er enn þá óleikfær og hefur af þeim sökum ekki verið skráður til leiks á mótinu.
