Enginn þeirra fjögurra leikmanna sem fengu rautt spjald í leikjum sjöundu umferðar Olísdeildar karla á sunnudaginn var úrskurðaður í leikbann á fundi aganefndar HSÍ í gær.
Eitt spjaldanna fjögurra var dregið til baka, það sem Jóhann Birgir Ingvarsson leikmaður FH fékk í viðureign ÍBV og FH í Vestmannaeyjum á sunnudaginn. Var það mat dómaranna, Ólafs Víðis Ólafssonar og Vilhelms Gauta Bergsveinssonar, að ákvörðun þeirra hafi verið röng. Féllst aganefnd á ósk þeirra að strika spjaldið út úr bókhaldinu.
Ágúst Birgisson, samherji Jóhanns Birgis, og Aftureldingarmennirnr Blær Hinriksson og Ihor Kopyshynskyi verða gjaldgengir í næstu leikjum liða sinna. Aganefnd notar tækifærið og vekur athygli þeirra á stighækkandi áhrifum útilokana vegna slíkra brota, skv. 2. mgr. 11. sömu reglugerðar.
Niðurstöðu aganefndar er hægt að nálgast hér.
