Afturelding situr ein í efsta sæti Grill 66-deildar kvenna eftir að hafa unnið ungmennalið Vals með 11 marka mun, 36:25, í Origohöllinni í kvöld. Afturelding hefur þar með tveggja stiga forskot á ÍR eftir 13 umferðir og hefur auk þess betri stöðu í innbyrðisleikjum. Grótta er þremur stigum á eftir Aftureldingu í þriðja sæti.
Ljóst var frá byrjun leiksins í Origohöllinni að Aftureldingarliðið ætlaði ekki að gefa nokkuð eftir gegn baráttuglöðu liði Vals sem hefur sótt í sig veðrið í síðustu leikjum. Vel einbeittir leikmenn Aftureldingar léku við hvern sinn fingur, ekki síst í vörninni. Mosfellingar fóru með sex marka forskot inn í hálfleikshléið, 20:14.
Aftureldingarliðið gaf ekki þumlung eftir í síðari hálfleik, þvert á móti þá sótti liðið frekar í sig veðrið en hitt og vann stórsigur, 36:25.
Staðan í Grill 66-deild kvenna.
Mörk Vals U.: Ásdís Þóra Ágústsdóttir 9, Ásrún Inga Arnarsdóttir 5, Arna Karitas Eiríksdóttir 3, Brynja Katrín Benediktsdóttir 3, Kristbjörg Erlingsdóttir 2, Ásthildur Jóna Þórhallsdóttir 1.
Varin skot: Hrafnhildur Anna Þorleifsdóttir 10, Saga Sif Gísladóttir 4.
Mörk Aftureldingar: Sylvía Björt Blöndal 9, Katrín Helga Davíðsdóttir 7, Susan Ines Gamboa 5, Katrín Erla Kjartansdóttir 4, Brynja Rögn Fossberg Ragnarsdóttir 3, Dagný Lára Ragnarsdóttir 2, Anna Katrín Bjarkadóttir 2, Ragnhildur Hjartardóttir 2, Drífa Garðarsdóttir 1, Þórhildur Vala Kjartansdóttir 1.
Varin skot: Mina Mandic 12, Rebecca Fredrika Adolfsson 1
