Ekkert virðist stöðva Orra Frey Þorkelsson og samherja hans í portúgalska meistaraliðinu Sporting frá Lissabon í deildarkeppninni heima fyrir. Í gærkvöld vann Sporting stórsigur á CF Os Belenenses, 43:23, á heimavelli eftir að hafa verið fjórum mörkum yfir í hálfleik, 16:12.
Orri Freyr skoraði fimm mörk, öll úr vítaköstum.
Sporting hefur fullt hús stiga, 45, eftir leikina 15 en gefin eru þrjú stig fyrir hvern sigur í portúgölsku deildinni. Fyrirliðinn Salvador Salvador var markahæstur með átta mörk. Costa-bræðurnir komu ekkert við sögu í liði Sporting að þessu sinni.
Stiven Tobar með sex mörk
Stiven Tobar Valencia skoraði sex mörk í sjö skotum þegar Benfica vann Avanca Bioria Bondalti, 34:25, á útivelli. Benfica er í þriðja sæti með 41 stig eftir að hafa lokið 15 leikjum.
Porto, án Þorsteins Leós Gunnarssonar, fór létt með grannliðið FC Gaia Empril, 45:27. Porto er í öðru sæti deildarinnar, stigi á undan Benfica, en hefur leikið einum leik fleira.
