„Okkur þykir ekki forsvaranlegt eins og ástandið er í samfélaginu að blanda saman fjölmennum hópum unglinga frá mörgum félögum víðsvegar að til þriggja daga æfinga. Þess vegna tókum við þá ákvörðun að hætta við æfingar unglingalandsliðanna að þessu sinni,“ sagði Magnús Kári Jónsson, starfsmaður HSÍ, spurður af hverju hætt hafi verið við fyrirhugaðar æfingar yngri landsliðanna sem fram áttu að fara um næstu helgi.
„Það er hvorki ábyrgt né boðlegt við þessar aðstæður að blanda saman ungmennum frá kannski tíu til fimmtán félögum ef eitthvað kemur upp á,“ sagði Magnús Kári.
Spurður hvort að með þessu væri HSÍ að senda félögunum skilaboð um að fella niður æfingar á næstu dögum sagði Magnús Kári svo alls ekki vera. Félögin meta aðstæður á hverjum stað og á hverjum tíma. Æfingar félaga hafi síðan í vor haldist í hendur við skólastarf á hverjum stað.
