Haukur Þrastarson landsliðsmaður í handknattleik er ekki kinnbeinsbrotinn eftir harkalegt samstuð við einn sóknarmanna króatíska landsliðsins í viðureigninni í gær. Eftir myndatöku hefur verið staðfest að kjálkinn er óskaddaður. Haukur er hins vegar mikið bólginn á kinn og kjálka eftir atvikið enda þurfti að sauma til að loka sárum innan og utan munnsins, eftir því sem handbolti.is kemst næst. Haukur huldi hluta andlitsins þegar hann kom með landsliðinu á æfingu í Malmö Arena um miðjan daginn
Slapp við heilahristing
„Hann er sem betur fer ekki kinnbeinsbrotinn og ekki með einkenni heilahristings eftir þetta svakalega högg,“ sagði Snorri Steinn Guðjónsson landsliðsþjálfari í viðtali við handbolta.is í Malmö í dag.
„Læknateymið segir að Haukur sé klár í leikinn. Hann kemur þar af leiðandi til greina eins og aðrir leikmenn,“ bætti Snorri Steinn við en vildi ekki nánar gefa upp um hvort hann hyggist gera einhverjar breytingar á leikmannahópnum fyrir viðureignina við Svía annað kvöld í annarri umferð Evrópumótsins í handknattleik karla.
Einn óskráður
Átján leikmenn eru í landsliðshópnum, þar af hafa 17 verið skráðir til leiks. Andri Már Rúnarsson hefur verið utan leikmannahópsins í tveimur síðustu leikjum og Elvar Ásgeirsson er enn þá óskráður til mótanefndar.
