Leiðinlegt veður er að gera marga gráhærða þessa dagana. Vafalaust er starfsmaður mótanefndar HSÍ einn þeirra. Hann hefur ekki undan að skáka til leikjum vegna veðurs og ófærðar á milli landshluta. Í morgun var tveimur leikjum í Olísdeild kvenna slegið á frest fram yfir helgina og rétt áðan var frestað tveimur leikjum sem fram áttu að fara í Vestmannaeyjum á morgun.
Annars vegar er um að ræða viðureign ÍBV og Selfoss í Olísdeild karla og hins vegar ÍBV og Stjörnunnar í Olísdeild kvenna.
Vonir standa núna til þess að viðureign ÍBV og Stjörnunnar í Olísdeild kvenna geti farið fram í Vestmannaeyjum á næsta þriðjudag og að flautað verði til leiks klukkan 18.
Að sama skapi gera bjartsýnustu menn sér vonir um að Suðurlandsslagur ÍBV og Selfoss í Olísdeld karla geti átt sér stað í Vestmannaeyjum á miðvikudaginn og fylkingarnar geti reynt með sér frá klukkan 18.
