Elís Þór Aðalsteinsson fór hamförum í dag og skoraði 15 mörk þegar ÍBV vann Aftureldingu, 34:33, í hörkuleik í Myntkauphöllinnni að Varmá í Mosfellsbæ í síðasta leik 7. umferðar Olísdeildar karla í handknattleik. Þar af skoraði Elís 10 mörk í fyrri hálfleik en Eyjamenn voru með tveggja marka forskot að honum loknum, 20:18. Eins og gefur að skilja var varnarleikur beggja liða ekki upp á marga fiska í fyrri hálfleik.
Eins og handbolti.is sagði frá fyrr í dag þá meiddist Petar Jokanovic markvörður ÍBV eftir ríflega stundarfjórðungsleik. Hann tognaði á lærvöðva og kemur vart við sögu í næstu leikjum Eyjaliðsins.
Á móti kemur að miklu máli skiptir fyrir ÍBV-liðið að fá hornamanninn öfluga Gabríel Martinez Róbertsson inn í liðið á ný, hvort sem það er til skemmri eða lengri tíma.
Þetta var annað tap Aftureldingarmanna í röð. Þeir sitja öðru sæti með 10 stig eins og KA sem er í þriðja sæti, tveimur stigum á eftir Haukum sem tróna einir á toppnum eftir sex sigurleiki í röð.
ÍBV lyftist upp fyrir Stjörnuna með sigrinum í dag og er í 5. sæti með átta stig.
Mikið gekk á í fyrri hálfleik. Varnarleikurinn sat á hakanum af hálfu beggja liða og leikmenn skoruðu nánast að vild. Það kunni Elís Þór og reyndar fleiri og menn skoruðu að vild en fóru einnig illa að ráði sínu á tíðum.
Afturelding minnkaði muninn í eitt mark í upphafi síðari hálfleiks, 20:19. Eftir það tóku við tíu slæmar mínútur hjá Aftureldingu þar sem illa gekk að skora þótt færi væru fyrir hendi. Leikmenn ÍBV færðu sér ástandið í nyt, náðu sex marka forskoti, 26:20. Það forskot var Afturelding að berjast við að vinna upp allt til loka og hefði með smá heppni getað brúað bilið.
Mörk Aftureldingar: Árni Bragi Eyjólfsson 10, Stefán Magni Hjartarson 6, Harri Halldórsson 4, Oscar Sven Leithoff Lykke 4, Ihor Kopyshynskyi 4, Ágúst Ingi Óskarsson 3, Kristján Ottó Hjálmsson 2.
Varin skot: Sigurjón Bragi Atlason 13.
Mörk ÍBV: Elís Þór Aðalsteinsson 15, Sveinn José Rivera 8, Andri Erlingsson 3, Gabríel Martinez Róbertsson 3, Dagur Arnarsson 2, Sigtryggur Daði Rúnarsson 2, Jakob Ingi Stefánsson 1.
Varin skot: Morgan Goði Garner 8, Petar Jokanovic 4.
Staðan og næstu leikir í Olísdeildum.
Gegn sterku liði ÍBV verður að nýta tækifærin sem gefast
Strákarnir svöruðu kallinu alveg frábærlega
