Elvar Örn verður frá keppni um tíma

Elvar Örn Jónsson landsliðsmaður í handknattleik og leikmaður efsta liðs þýsku 1. deildarinnar, MT Melsungen, verður frá keppni tvær til fjórar vikur eftir því sem félagið tilkynnti í dag. Hann tognaði á nára í viðureign MT Melsungen og Flensburg á laugardaginn. Af þeim sökum var Elvar Örn ekki valinn í íslenska landsliðið sem kynnt var til sögunnar í dag vegna leikja við Grikki heima og að heiman í undankeppni EM í næstu viku.

Elvar Örn hefur nær hvíldarlítið leikið með MT Melsungen síðustu vikur eftir að hann lauk keppni með íslenska landsliðinu á HM. Melsungen hefur staðið í ströngu, bæði í Evrópudeildinni í handknattleik og í þýsku 1. deildinni þar sem liðið stefnir á að vinna þýska meistaratitilinn í fyrsta sinn.