Elvar Otri Hjálmarsson hefur skrifað undir samning við handknattleiksdeild ÍR. Samningur ÍR og Elvars Otra er til næstu tveggja ára. Elvar Otri hefur leikið með Gróttu undanfarin þrjú ár. Hann er þriðji leikmaður Gróttu á síðustu leiktíð sem færir sig um set í dag.
Elvar Otri lék upp yngri flokka og upp í meistaraflokk með Fjölni. Til Gróttu kom hann 2022 og hefur síðan verið einn af traustustu leikmönnum liðsins. Grótta féll úr Olísdeildinni í vor eftir tap fyrir Selfoss í úrslitum umspils Olísdeildar.
Elvar Otri er fjölhæfur leikmaður sem getur spilað allar stöður fyrir utan og mun nýtast ÍR vel á báðum endum vallarins eftir því sem ÍR-ingar segja í tilkynningu en þeir boða frekari tíðindi úr Skógarseli á næstunni.
„Við ÍR-ingar erum afar ánægðir með komu Elvars og hlökkum til að sjá hann láta til sín taka í Skógarselinu. Fleiri jákvæðra fregna er að vænta úr okkar herbúðum á næstu dögum,“ segir m.a. í tilkynningu frá handknattleiksdeild ÍR.
Fyrri í dag var tilkynnt um vistaskipti Jóns Ómars Gíslasonar frá Gróttu til Hauka og félagaskipti Ágúst Inga Óskarssonar til Aftureldingar frá Gróttu.
