Íslenska landsliðið mætir Serbíu og Noregi í milliriðlakeppni Evrópumóts 17 ára landsliða kvenna í handknattleik á mánudag og þriðjudag í Podgorica í Svartfjallalandi. Fyrri viðureignin í milliriðlum hefst klukkan 12.30 á mánudaginn. Daginn eftir verður flautað til leiks gegn Noregi klukkan 10.
Milliriðlakeppnin sem Ísland tekur þátt í er um sæti 12 til 24.
Að loknum leikjunum á mánudag og þriðjudag verður frídagur á miðvikudaginn. Á fimmtudag og föstudag tekur við krossspil milli milliriðla. Hverjir verða andstæðingar þar og hvort Ísland verður í hóp þeirra þjóða sem leika um sæti níu til sextán eða sautján til 24, veltur á úrslitum viðureignanna á mánudag og þriðjudag.
Eins ótrúlega og það kann að hljóma, vegna þess að íslenska landsliðið mun leika í milliriðlakeppni um sæti 12 til 24, þá er er enn möguleiki á að Ísland hafni í 9. sæti mótsins. Það er sökum þess að fjögur af þeim liðum sem ná lökustum árangri í milliriðlakeppni um sæti eitt til tólf blandast inn í krossspil um sæti níu til sextán á fimmtudag og föstudag.
