Íslenska landsliðið í handknattleik kvenna, skipað leikmönnum 19 ára og yngri, mætir landsliði Norður Makedóníu á morgun í næst síðasta leik sínum á Evrópumótinu í Rúmeníu.
Sigurlið leiksins leikur um 13. sæti mótsins á laugardaginn en tapliðið um 15. sætið sama dag. Leikmenn og þjálfarar íslenska landsliðsins nýttu daginn í dag til þess að búa sig undir leikinn á morgun sem er afar mikilvægur þar sem þrettán efstu lið mótsins tryggja sér farseðil á heimsmeistaramóti 20 ára landsliða sem fram fer eftir ár. Þess vegna er sennilegt að íslenska liðið verði að vinna tvær síðustu viðureignir sínar til þess að krækja í farseðilinn.
Hálftíma akstur
Síðustu tveir leikir íslenska landsliðsins fara fram í bænum Mioveni sem er í hálftíma akstursfjarlægð frá Pitesi þar sem liðið dvelur á hóteli og lék fimm fyrstu leiki sína í mótinu.
Í dag var æft í Sala Sporturilor í Mioveni. Eftir því sem næst verður komist eru aðstaða í Sala Sporturilor öll hin besta.
Hlakkar leikmenn íslenska liðsins til þess að leika þar á morgun og njóta um leið frábærs stuðnings þess vaska hóps sem fylgt hefur liðinu eftir frá fyrsta degi og stutt það með ráðum og dáð.
Líkamlega sterkar
Ágúst Þór Jóhannsson annar þjálfara íslenska liðsins sagði daginn hafa verið vel nýttan til æfinga, funda og síðast en ekki síst til þess að safna kröftum fyrir átökin á morgun. Leikmenn landsliðs Norður Makedóníu væru hávaxnar og sterkbyggðar.
Mættust fyrir ári
Þess má til fróðleiks geta að nánast sömu lið mættust í milliriðlakeppni HM 18 ára landsliða í Skopje í byrjun ágúst á síðasta ári. Ísland vann leikinn með þriggja marka mun, 25:22.
Textalýsing
Viðureign Íslands og Norður Makedóníu hefst klukkan 10 í fyrramálið, föstudag. Að vanda fylgist handbolti.is með viðureigninni í textalýsingu.
