- Auglýsing -
Díana Dögg Magnúsdóttir og samherjar BSV Sachsen Zwickau töpuðu í gær með minnsta mun, 28:27, á útivelli fyrir TuS Lintfort í þýsku 2. deildinni í handknattleik en leikið var á heimavelli síðarnefnda liðsins. Þar með er BSV Sachsen Zwickau fjórum stigum á eftir Füchse Berlin sem er efst í deildinni með 23 stig að loknum 12 leikjum. Herrenberg er í þriðja sæti, stigi á eftir Díönu og samherjum auk þess að hafa leikið einum leik færra.
Staðan var jöfn að loknum fyrri hálfleik, 12:12. Snemma í síðari hálfleik tóku leikmenn TuS Lintfort forystuna og voru með tveggja til fjögurra marka forskot allt þar til á síðustu mínútunum að leikmenn BSV Sachsen Zwickau gerðu áhlaup. Það gerðist hinsvegar of seint. Ekki tókst að brúa bilið og leikmenn Lintfort fögnuðu sigri en liðið er í sjöunda sæti, á reyndar tvo leiki inni á efstu liðin.
Díana Dögg skoraði fjögur mörk í sjö skotum og átti auk þess tvær stoðsendingar.
Á næsta laugardag verður toppslagur í deildinni þegar efsta liðið, Füchse Berlin sækir Díönu Dögg og samherja heim til Zwickau.
- Auglýsing -
