Egyptar eru komnir í átta liða úrslit á heimsmeistaramótinu í handknattleik karla eftir nauman sigur á Slóvenum, 26:25, í Zagreb Arena í kvöld. Minnstu mátti muna að Slóvenar jöfnuðu metin á síðustu sekúndum en boltinn var dæmdur af þeim einni sekúndu fyrir leikslok vegna leiktafar. Þeir höfðu þá verið í sókn í 50 sekúndur. Hefðu Slóvenar jafnað metin og tekið stig úr leiknum hefði það verið vatn á myllu íslenska landsliðsins í kapphlaupinu um sæti í átta liða úrslitum.
Egyptar voru yfir allan leikinn og voru með fjögurra marka forskot skömmu fyrir leikslok, 23:19. Slóvenar bitu frá sér undir lokin og taugarnar biluðu hjá Egyptum og hver sóknin á eftir annarri rann út í sandinn.
Egyptar eiga eftir leik við Grænhöfðaeyjar á föstudaginn. Króatar, sem leika við Ísland í kvöld, leika við Slóvena í lokaumferðinni. Ísland og Argentína mætast. Argentínumenn unnu Grænhöfðeyinga, 30:26, í dag.
Viðureign Íslands og Króatíu hefst klukkan 19.30 í Zagreb Arena.
