Engin draumabyrjun í úrslitakeppninni í Svíþjóð

Aldís Ásta Heimisdóttir og Jóhanna Margrét Sigurðardóttir skoruðu þrjú mörk hvor þegar lið þeirra, Skara HF, tapaði fyrir H65 Höör í fyrstu viðureign liðanna í átta liða úrslitum sænsku úrvalsdeildarinnar í handknattleik í kvöld, 30:27. Leikurinn fór fram á heimavelli Höör. Næsta viðureign verður í Skara á sunnudaginn.

Aldís Ásta átti þrjár stoðsendingar í leiknum en Jóhanna Margrét eina. Það styrkti Skaraliðið talsvert að Sara Johansson lék með á ný eftir meiðsli. Hún er markahæsti leikmaður liðsins á tímabilinu.

Ekki gekk betur hjá Bertu Rut Harðardóttir og hennar samherjum í Kristianstad HK. Þær steinlágu í heimsókn til Önnereds í Gautaborg, 36:26. Berta skoraði tvisvar sinnum. Liðin eigast við öðru sinni í Kristianstad á sunnudaginn.