Danski handknattleiksmaðurinn Mathias Gidsel er ekki falur, sama hversu háar fjárhæðir verða boðnar í hann, segir Bob Hanning framkvæmdastjóri Füchse Berlin við Bild en á dögunum var sagt frá því að forráðamenn þýska liðsins Flensburg-Handewitt hafi í hyggju að kaupa upp samning Gidsel við Berlínarliðið.
Gidsel er 25 ára gamall og þykir um þessar mundir vera fremsti, eða einn fremsti handknattleikmaður, sem leikur á þýskri grund. Hann kom til Berlínarliðsins 2022 og er samningsbundinn félaginu fram til 2028. Bild taldi sig hafa heimildir fyrir að Flensburg vildi krækja í Danann 2026. Lengi hafa verið sterk tengsl á milli danskra handknattleiksmanna og þjálfara við félagið frá landamærabænum sem eitt sinn tilheyrði Danmörku.
Gidsel hefur farið á kostum með Füchse Berlin síðustu árin og verið meðal marka- og stoðsendingahæstu leikmanna þýsku 1. deildarinnar. Gidsel hefur einnig gert það gott með heims- og Ólympíumeisturum Danmerkur og m.a. valinn mikilvægasti leikmaður tvennra síðustu Ólympíuleika.
Gidsel líkar vel við lífið í Berlínarliðinu þótt það hafi ekki rakað til sín verðlaunum síðan hann kom. Gidsel segir við Bild að mestu máli skipti fyrir sig að þróast og þroskast sem leikmaður. Meðan hann geri það sé ekki löngun fyrir að fara til annars félags.
Füchse Berlin hefur séð á bak styrktaraðilum síðustu misseri og er sagt leita að 2 milljónum evra, 300 milljónum króna, til að fylla upp í fjárhagsgatið. Þar af leiðandi var e.t.v. talið að sala á Gidsel gæti komið til greina til að létta undir reksturinn.
