„Við búum okkur undir erfiða rimmu sem getur farið í allar áttir,“ sagði Ágúst Þór Jóhannsson þjálfari Vals í samtali við samfélagsmiðla félagsins í tilefni af fyrstu viðureign Vals og ÍBV í undanúrslitum Olísdeildar kvenna í handknattleik sem fram fer á heimavelli Vals í kvöld. Flautað verður til leiks klukkan 17. Valur og ÍBV mættust í úrslitum Íslandsmótsins. Ljóst er að annað hvort liðið nær ekki í úrslitaleikina að þessu sinni.
Réttur mánuður er í dag síðan 21. og síðasta umferð Olísdeild kvenna fór fram.
„Við verðum að vera klár á okkar grunngildum, vörn og markvarsla verður að vera góð auk þess sem við verðum að keyra hratt á ÍBV-liðið, bara vera í standi. Við erum með gott lið en við verðum að kalla fram alvöru frammistöðu og það ætlum við okkur,“ sagði Ágúst Þór spurður hvað lið hans þurfi að gera til þess að vinna ÍBV sem hefur á að skipa reyndum leikmönnum.
Lengra viðtal er við Ágúst á myndskeiðinu hér fyrir neðan sem fengið er af Facebook-síðu Vals handbolta.
ÍBV vann ÍR í tveimur leikjum í fyrstu umferð. Valur sat yfir í fyrstu umferð ásamt Fram sem einnig mætir til leiks í kvöld og keppir við Hauka í Lambhagahöllinni í Úlfarsárdal klukkan 19.40.
Sjá einnig:
Umspil Olís kvenna: leikjadagskrá og úrslit
