„Þetta er frábær árangur. Við vinnum þrjá hörkuleiki sem er ógeðslega vel gert,“ sagði Einar Jónsson þjálfari Íslandsmeistara Fram í heldur endasleppu viðtali við handbolt.is eftir að hann hafði stýrt liði sínu til sigurs á Val og þar með á Íslandsmótinu í kvöld tólf árum eftir að hann stýrði liði Fram síðast til Íslandsmeistaratitils þá gegn Haukum.
„Við höfum verið góðir á lokamínútum í þeim leikjum sem skipt hafa máli. Sjálfstraustið er mikið. Erum við ekki bara bestir? Á bak við þetta eru fullt af atriðum sem hundleiðinlegt er að hlusta á en að grunni til er bara mikil vinna,“ sagði Einar Jónsson þjálfari Fram áður en viðtalið tók snöggan enda sem nánar segir frá hér að neðan.
Viðtali við Einar er endasleppt vegna þess að í miðjum klíðum gat fréttaþulur RÚV, reyndar á frívakt, ómögulega setið á strák sínum heldur óð inn í viðtalið til óska Einari til hamingju með Íslandsmeistaratitilinn.
