Handknattleikssamband Evrópu, EHF, hefur ákveðið að koma á laggirnar nýrri keppni fremstu landsliða Evrópu undir heitinu Evrópuleikar landsliða. Stefnt er á að leikarnir verði haldnir á fjögurra ára fresti og að þeir fyrstu fari fram í september 2030. Átta bestu karla- og kvennalandslið álfunnar (miðað við síðasta EM landsliða) kljást um sæti í handknattleikskeppni Ólympíuleikana 2032 í Brisbane í Ástralíu.
Eins og áður segir er stefnt á að Evrópuleikarnir fari fram í september fjórða hvert ár og verði hluti af landsliðsvikum sem komið verður á laggirnar.
Breytingarnar eru liður í að festa betur í sessi forkeppni Evrópuhluta forkeppni Ólympíuleikanna. Hingað til hafa landslið Evrópu unnið sér inn sæti í forkeppni Ólympíuleikanna með árangri á heimsmeistaramóti og einnig hafa verið laus sæti í gegnum árangur á Evrópumótum landsliða. Fyrirkomulagið er að margra mati ruglingslegt og býður ekki upp á mikinn fyrirsjáanleika, eins og í tísku er að segja um þessar mundir.
Hluti af fleiri breytingum
Undirbúningur fyrir Evrópuleikana helst í hendur við að koma á öðru fyrirkomulagi fyrir undankeppni Evrópu fyrir heimsmeistaramót IHF.
Stefnt er á að endanleg útfærsla á keppnisfyrirkomulagi Evrópuleikanna liggi fyrir eftir fund framkvæmdastjórnar EHF í desember.
