Simon Hald, línumaður og varnartröll þrefaldra meistara Danmerkur, þarf að bíða enn um sinn eftir því að komast aftur á handboltavöllinn. Hald fann fyrir hjartsláttartruflunum í leik gegn Íslandi í undanúrslitum EM 2026 í Herning í lok janúar og hefur ekki getað spilað síðan.
Í samtali við TV2 Nord segir Hald að hann megi ekki spila á meðan hann er á blóðþynningarlyfjum, sem Hald var settur á vegna gáttatifs í hjartanu.
Hjartsláttartruflanir en ekki höfuðmeiðsli hjá Hald
„Það gengur mjög vel. Ég finn ekki fyrir neinu þannig að það er svolítið skrítið að sitja uppi í stúku og horfa á leiki. Ég er ekki enn búinn að finna fyrir neinum verkjum en við komumst að samkomulagi við læknana sem við höfum ráðfært okkur við að nota lyfin í fullu samræmi við leiðbeiningarnar sem eru gefnar,“ segir hann.
Hald, sem er leikmaður Aalborg Håndbold í heimalandinu, segist þurfa að vera á lyfjunum í tvær vikur til viðbótar. Eftir það megi hann hefja leik að nýju af fullum krafti.
