„Fyrst og fremst svekkjandi tap gegn gríðarlega sterku serbnesku landsliði sem leikið hefur vel á mótinu og meðal annars unnið Svía fram til þessa. Við vissum að leikurinn yrði erfiður en mér fannst stelpurnar leika að mörgu leyti vel í sókninni sem var ágætlega útfærð. Hinsvegar vorum við sjálfum okkur verst að fara illa með mörg góð marktækifæri,“ sagði Ágúst Þór Jóhannsson eftir fimm marka tap 19 ára landsliðs kvenna fyrir Serbum, 29:24, í leik um sæti níu til sextán á Evrópumótinu í Svartfjallalandi í morgun.
Noregur á morgun
Tapið leiðir til þess að íslenska liðið tekur þátt í krossspili við norska landsliðið á morgun um það hvort liðið leikur um 13. sæti mótsins á sunnudaginn. Serbar leika um réttinn til þess að hreppa níunda sætið við Rúmeníu.
Köflóttur varnarleikur
„Varnarleikurinn var á köflum góður en þó opnuðum við okkur of mikið á stundum, ekki síst í hornunum þar sem við ætluðum að vera fastari fyrir. Markvarslan hefði líka geta verið betri en allt helst þetta í hendur,“ sagði Ágúst Þór og bætti við að íslenska liðið hafi fengið fá hraðaupphlaup. „Ofan á annað þá fórum við illa með nokkur þeirra hraðaupphlaupa sem við fengum.”
Þjálfari lauk lofsorði á liðsandann og stemninguna í hópnum sem væri til fyrirmyndar á hverju sem gangi.„Það vantaði ekkert upp á baráttu og vinnusemi en við vorum á tíðum sjálfum okkur verst,“ sagði Ágúst Þór og bætti við.
Þurfum heilsteyptari frammistöðu
„Okkur hefur vantað heilsteyptari frammistöðu í mótinu, ná heilum góðum leik til að ná sigri gegn betri liðum mótsins. Við höfum verið svona næstum því,“ sagði Ágúst Jóhannsson sem hefur ásamt samstafsmanni sínum Árna Stefáni Guðjónssyni sólarhring til þess að búa íslenska liðið undir næsta leik, gegn Noregi.
Fimm marka tap fyrir Serbum – mæta næst norska landsliðinu
