Færeyska landsliðið í handknattleik pilta, skipað leikmönnum 19 ára og yngri, vann það afrek í dag að tryggja sér þátttökurétt á Evrópumeistaramóti 20 ára landsliði, A-keppni, sem fram fer í júlí á næsta ári. Þetta er í fyrsta skipti í sögunni sem færeyskt landslið tryggir sér keppnisrétt í lokakeppni EM.
Á EM á næsta ári munu 16 bestu landslið Evrópu reyna með sér, þar á meðal íslenska landsliðið sem tryggði áframhaldandi veru sína í A-deild EM með því að hafna í áttunda sæti á EM sem lauk í Króatíu í dag.
Keppni í B-deildinni EM fór fram í þremur hlutum og vann færeyska landsliðið þann hluta sem fram fór í Varna í Búlgaríu. Færeyingar unnu Hvít-Rússa í æsispennandi úrslitaleik, 31:30, eftir að hafa verið tveimur mörkum undir í hálfleik, 18:16. Hvít-Rússar voru skrefi á undan allt þar til fimm mínútur voru eftir. Þá tókst færeysku piltunum að jafna metin, 28:28. Þeir sýndu mikla seiglu á endasprettinum og unnu kærkominn og sætan sigur.
Þetta er í annað sinn sem eitt af yngri landsliðum Færeyja vinnur sér keppnisrétt í A-hluta stórmóts í handknattleik en blað var brotið 2017 þegar Færeyingar tóku þátt í HM 21 árs landsliða í Alsír í fyrsta sinn.
Færeyska U19 ára landsliðið er skipað mörgum af efnilegustu handknattleiksmönnum sem komið hafa fram í landinu. Fremstur í flokki fer Elias Ellefsen á Skipagøtu sem er af mörgum talinn einn efnilegasti handknattleiksmaður Norðurlanda. Hann skoraði 13 mörk í úrslitaleiknum í dag.
Þessi hópur var uppistaðan í U17 ára landsliði Færeyinga sem vann Opna Evrópumótið sem fram fór í Svíþjóð vorið 2019.
Pólverjar urðu hlutskarpastir í B-hluta EM sem fram fór í Norður Makedóníu á síðustu dögum og Svartfellingar hrósuðu sigri í keppninni sem leikin var í Lettlandi.
Ástæða þess að aðeins líður ár frá lokakeppni EMU19 ára á þessu ári fram að EMU20 ára næsta ári er sú að í ár átti að fara fram HMU19 ára liða. Mótið var fellt niður vegna kórónuveirunnar. Handknattleiksamband Evrópu ákvað þá að nota tækifærið og blása til EMU19 ára landslið og bæta þar með upp fyrir EMU18 ára landsliða sem slegið var af á síðasta ári.
