Fanney Þóra Þórsdóttir tryggði FH annað stigið í viðureign efstu liða Grill66-deildar kvenna í handknattleik í Sethöllinni á Selfossi í kvöld. Hún jafnaði metin, 28:28, úr vítakasti á síðustu sekúndu leiksins. Áður hafði Roberta Strope brotið á sóknarmanni FH þegar sex sekúndur voru til leiksloka. Strope fékk rautt spjald fyrir vikið.
FH heldur þar með efsta sæti deildarinnar. Liðið hefur 10 stig eftir sjö leiki og er stigi á undan Selfoss sem á leik til góða.
Viðureignin í Sethöllinni á Selfossi í kvöld var jöfn og spennandi frá upphafi til enda. Sjaldan munaði nema einu marki á annan hvorn veginn. Þó hafði FH tveggja marka forskot að loknum fyrri hálfleik, 16:14.
Mörk Selfoss: Tinna Sigurrós Traustadóttir 9, Elín Krista Sigurðardóttir 5, Elínborg Katla Þorbjörnsdóttir 4, Kristín Una Hólmarsdóttir 3, Roberta Strope 3, Tinna Soffía Traustadóttir 2, Katla Björk Ómarsdóttir 2.
Mörk FH: Fanney Þóra Þórsdóttir 9, Emma Havin Sardarsdóttir 4, Emilía Ósk Steinarsdóttir 4, Hildur Guðjónsdóttir 4, Sigrún Jóhannsdóttir 3, Emilie Vagnes Jakobsen 2, Hrafnhildur Anna Þorleifsdóttir 1, Birna Íris Helgadóttir 1.
Stöðuna og næstu leiki í Grill66-deild kvenna má sjá hér.
