Heiðrún Dís Magnúsdóttir, markvörður Stjörnunnar, varð fyrir því óláni í leik KA/Þórs og Stjörnunnar að fá boltann í andlitið þegar hún gerði tilraun til að verjast skoti úr horni eins og sést af meðfylgjandi mynd Egils Bjarna Friðjónssonar.
Heiðrún Dís fór vitanlega af leikvelli vegna þessa og kom ekkert meira við sögu í leiknum eins og eru eðlileg viðbrögð við höggi af þessu tagi. Henni leið eðlilega ekki vel eftir leikinn, að sögn Sigurjóns Friðbjörns Björnssonar, annars þjálfara Stjörnuliðsins. Víst er að Heiðrún Dís, sem gekk til liðs við Stjörnuna frá Fram í sumar, þarf að taka sér hvíld frá æfingum meðan hún jafnar sig enda geta afleiðingar höfuðhögga verið alvarlegar.
Alþjóða handknattleikssambandið er með í smíðum breytingar á reglum í handboltanum. Í þeim á m.a. að taka á því þegar bolta er kastað í andlit markvarðar eins og lesa má um hér.
Handbolti.is sendir Heiðrúnu Dís bestu batakveðjur.
