„Þetta hefur bara verið geggjað,“ sagði Anna Karólína Ingadóttir annar markvörður 20 ára landsliðsins í handknattleik eftir sigur íslenska landsliðsins á Sviss í leiknum um sjöunda sætið á heimsmeistaramótinu í handknattleik í Skopje í morgun. Anna Karólína var að taka þátt í sínu fyrsta landsliðsverkefni og var eðlilega í sjöunda himni yfir reynslunni og gleðinni sem þátttökunni fylgdi enda gekk íslenska landsliðinu afar vel.
„Það hefur verið mjög góð reynsla að leika móti mörgum liðum og mæta nýjum andstæðingum. Ég er mjög stolt yfir að hafa verið valin og vera hérna á mótinu,“ sagði Anna Karólína ennfremur en hún leikur með Gróttu og verður í Olísdeildinni á næsta tímabili.
Anna Karólina kom inn á í leiknum í dag þegar um fimm mínútur voru til hálfleiks í miklum spennuleik og stóð vaktina þangað til um tíu mínútur voru eftir. M.a. varði Anna vítakast á stöðunni 19:18 þegar Sviss gat jafnað.
„Ég var nokkuð ánægð með minn hlut. Ég hefði getað varið fleiri skot en annars fannst mér ganga vel,“ sagði Anna Karólína sem fer með góðar minningar í farteskinu heim frá Skopje sem er aðalmálið þegar upp er staðið.
Lengra myndskeiðsviðtal er við Önnu Karólínu efst í þessari frétt.
Sigur á Sviss í lokaleiknum – 7. sætið á HM í höfn
HMU20: Dagskrá og úrslit síðustu leikdagana
