Sigurlaug Rúnarsdóttir og Jóhann Ingi Guðmundsson stjórnendur hlaðvarpsþáttarins Kvennakastið láta sig að sjálfsögðu ekki vanta á heimsmeistaramót kvenna í handknattleik í Noregi þar sem íslenska landsliðið er í eldlínunni. Fyrr í dag fór í loftið þeirra nýjasti þáttur sem unnin í Stavangri.
Gestir Sigurlaugar og Jóhanns í þættinum eru Eyjahjónin Erlingur Richardson og Vigdís Sigurðardóttir, foreldrar, Söndru Erlingsdóttur landsliðskonu. Farið er yfir fyrsta leik á heimsmeistaramótinu sem var grátlegt tap á móti Slóveníu. Stiklað er á stóru yfir glæsilegan handboltaferil hjónanna en bæði léku þau með íslenska landsliðinu og hafa orðið Íslandsmeistarar sem leikmenn og þjálfarar.
Til viðbótar eru í þættinum viðtöl við landsliðskonurnar Elínu Jónu Þorsteinsdóttur, Hildigunni Einarsdóttur, Katrínu Tinnu Jensdóttur og Perlu Ruth Albertsdóttur sem tekin voru upp í gær og í dag.
Frábær klukkustundarlangur kvennakastsþáttur frá Stavangri. Hlekk á þáttinn er að finna hér fyrir neðan.
