FH-ingar sækja Þórsara heim eftir sigur á Ísafirði

FH tryggði sér sæti í átta liða úrslitum í Coca Cola-bikar karla í handknattleik með öruggum sigri á Herði, 38:20, í viðureign liðanna á Ísafirði. FH sækir Þór Akureyri heim í átta liða úrslitum á miðvikudagskvöldið kl. 19. Leikið verður í Íþróttahöllinni á Akureyri. Þór fær heimaleik vegna þess að liðið er í lægri deild en FH.

FH-ingar voru með yfirhöndina frá upphafi til enda á Torfnesi í dag. Þeir voru 10 mörkum yfir að loknum fyrri hálfleik, 21:11.

Harðarliðið var m.a. með fjóra uppalda leikmenn í byrjunarliði sínu í dag sem verður að teljast afar vel af sér vikið fyrir svo ungt félag. Leikmenn liðsins reyndu hvað þeir gátu og gerðu sitt besta. Það var hinsvegar við ofurefli að etja í toppliði Olísdeildar karla.

Mörk Harðar: Guntis Pilpuks 6, Jón Ómar Gíslason 4, Óli Björn Vilhjálmsson 3, Mikel Arista Amilibia 2, Þráinn Ágúst Arnaldsson 2, Axel Sveinsson 1, Ásgeir Óli Kristjánsson 1, Daníel Wale Adeleye 1.
Mörk FH: Jakob Martin Ásgeirsson 8, Einar Örn Sindrason 6, Birgir Már Birgisson 4, Atli Steinn Arnarson 3, Bergur Elí Rúnarsson 3, Gytis Smantauskas 3, Jón Bjarni Ólafsson 2, Egill Magnússon 2, Jóhann Birgir Ingvarsson 2, Leonharð Þorgeir Harðarson 2, Hynur Jóhannssoon 2, Ágúst Birgisson 1.