Fimleikafélag Hafnarfjarðar, FH, heiðraði einn af sínum dáðustu sonum, Gísla Þorgeir Kristjánsson, þegar FH og Stjarnan mættust í Bestu deild karla í knattspyrnu á Kaplakrikavelli.
Ástæða þess að FH-ingar kölluðu Gísla Þorgeir fram á Kaplakrikavöll fyrir leikinn er sú að hann var í annað sinn valinn mikilvægasti leikmaður úrslitahelgar Meistaradeildar Evrópu í síðasta mánuði þegar hann var prímusmótorinn í liði SC Magdeburg er liðið varð Evrópumeistari í annað sinn á þremur árum. Eins og fyrir tveimur árum þegar SC Magdeburg varð Evrópumeistari fórnaði Gísli Þorgeir sér fyrir liðið og lék alvarlega meiddur í undanúrslita- og í úrslitaleiknum en fór engu að síður með himinskautum á leikvellinum.
Aðeins tveir FH-ingar
Aðeins einn handknattleiksmaður til viðbótar hefur áður verið valinn tvisvar mikilvægasti maður úrslitahelgar Meistaradeildar Evrópu. Það er annar FH-ingur, Aron Pálmarsson 2014 og 2016.
