Staðfest er á heimasíðu HSÍ að fjórði úrslitaleikur Hauka og ÍBV í úrslitum um Íslandsmeistaratitilinn í handknattleik karla hefst klukkan 19 á mánudaginn á Ásvöllum.
Þegar þetta er ritað upp úr klukkan 10 á laugardegi hefur ekki verið opnað fyrir miðasölu hjá Stubb. Viðbúið er þó að miðasala hefjist fljótlega og að mikil spurn verði eftir miðum, ef að líkum lætur.
Haukar unnu þriðju viðureign liðanna í Vestmannaeyjum í gærkvöld, 34:28, að viðstöddum metfjölda áhorfenda á handboltaleik í Eyjum.
Haukar geta jafnað metin með sigri á heimavelli á mánudagskvöldið. Takist ÍBV að vinna fellur Íslandsmeistarabikarinn liðsmönnum í skaut. Yrði það í annað sinn sem leikmenn ÍBV taka við Íslandsbikarnum á Ásvöllum.
Komi til oddaleiks um Íslandsmeistaratitilinn fer hann fram í Vestmannaeyjum á miðvikudaginn.
Uppfært: Miðasala er hafin á Stubb.
