Sandra Erlingsdóttir og samherjar í EH Aalborg unnu 14 marka sigur á Gudme HK í dönsku B-deildinni í handknattleik á heimavelli í dag í upphafsumferð deildarinnar, lokatölur 32:18. Álaborgar-liðið er talið vera sterkasta lið deildarinnar og sýndi það í dag að eitthvað er til í þeim vangaveltum.
Aðeins munaði fjórum mörkum á liðunum í hálfleik, 13:9. Í síðari hálfleik fengu Fjónbúarnir heldur betur að finna til tevatnsins og var leikurinn nánast einstefna af hálfu Söndru og félaga.
Sandra lék á miðjunni í sóknarleik EH Aalborg gegn 5/1 vörn leikmanna Gudme. Hún skoraði eitt mark. Þá lék hún í stöðu bakvarðar í vörninni, eftir því sem handbolti.is heyrði hjá glöggum manni sem fylgdist grannt með leiknum.
Sandra gekk til liðs við EH Aalborg í sumar eftir að hafa leikið með Val í tvö ár og þar áður með ÍBV en Sandra er ættuð úr Vestmannaeyjum, dóttir Erlings Richardssonar og Vigdísar Sigurðardóttir.
