Hilmar Guðlaugsson hefur verið ráðinn þjálfari meistaraflokksliðs HK í handknattleik kvenna en liðið leikur í Grill 66-deildinni á næstu leiktíð. Hilmar er ekki með öllu ókunnur hjá HK. Hann þjálfaði hjá félaginu um árabil, m.a. meistaraflokk kvenna frá 2010 – 2015, auk yngri flokka.
Undanfarin sex ár hefur Hilmar búið og starfað í Noregi. Framan af var hann þjálfari í Førde en færði sig um set og hefur á síðustu árum þjálfað hjá Volda. M.a. var Hilmar aðstoðarþjálfari kvennaliðs félagsins sem lék í fyrsta sinn í úrvalsdeildinni á nýliðnu keppnistímabili.
Hilmar þjálfaði á Selfossi eftir að hann hætti hjá HK og áður en hann flutti til Noregs.
„Um leið og við heyrðum að því að Hilmar væri að fara flytja aftur heim þá fórum við á fullt í að reyna fá hann aftur til okkar, enda var hann ofboðslega vel liðinn og alltaf verið í miklum metum hjá félaginu,“ segir Daníel Berg Grétarsson formaður handknattleiksdeildar HK í tilkynningu.
„Margir leikmenn hafa horfið á braut eftir að við féllum núna í vor og því mikilvægt að ráða góðan og reyndan þjálfara sem raunin er með Hilmar. Það er mikil vinna framundan og er Hilmar fyrsta skrefið á þeirri vegferð sem nú hefst með kvennaliðið og bindum við miklar vonir við hann á komandi árum.
Hann kemur síðan inn í fullt starf hjá okkur að ári liðnu og kemur til með að taka þátt í að móta nýja framtíðarstefnu HK,“ segir Daníel Berg Grétarsson formaður handknattleiksdeildar HK.
