„Það er alltaf barningur þegar maður leikur við ÍBV, stál í stál. Maður þarf alltaf að jafna orkuna þeirra og vera klókur að fara ekki að elta vitleysuna þeirra. Eyjamenn leika oft á huga manna,“ segir Blær Hinriksson leikmaður Aftureldingar í samtali við handbolta.is eftir sigur Mosfellinga á ÍBV, 32:30, í fyrsta leik liðanna í átta liða úrslitum Olísdeildar karla að Varmá í kvöld.
„Við náðum að halda í við okkar leik og vera með mistök innan skekkjumarka, ekki síst í síðari hálfleik. Fyrri hálfleikurinn var svolítið mistækur hjá okkur. Í síðari hálfleik náðum við stíga aðeins upp og þá náðum við yfirhöndinni. Við þekkjum okkar gildi og þegar við höldum okkur við planið þá kemur leikurinn til okkar,“ sagði Blær ennfremur.
Næsti leikur Aftureldingar og ÍBV verður í Eyjum á þriðjudaginn. „Við urðum að setja tóninn fyrir næsta leik í Eyjum með því að vinna í dag. Við förum með fullt sjálfstraust til Eyja,“ sagði Blær Hinriksson sem var næst markahæstur Aftureldingarmanna í leiknum með sex mörk.
Lengra viðtal við Blæ er í myndskeiði hér fyrir ofan.
Sjá einnig:
Vorum orðnir þreyttir
x
