Landsliðskonan í handknattleik, Andrea Jacobsen, fór vel af stað með nýju liði sínu, Silkeborg-Voel, í dönsku úrvalsdeildinni í kvöld. Hún skoraði fimm mörk og varð næst markahæst í liðinu þegar það vann Ringkøbing Håndbold, 36:26, á heimavelli í fyrstu umferð.
Silkeborg-Voel-liðið lagði grunn að sigrinum í fyrri hálfleik. Liðið var með átta marka forskot að honum loknum, 19:11.
Færði sig um set í sumar
Andrea færði sig óvænt um set í sumar eftir að forráðamenn Silkeborg-Voel báru í hana víurnar. Andrea hafði þá nokkru áður endurnýjað samning sinn við EH Aalborg sem leikur í næst efstu deild. Silkeborg-Voel vantaði leikmann í hasti vegna meiðsla sem komu upp. Hikuðu þeir ekki að sækja Andreu frá EH Aalborg. Hún hefur staðið undir væntingum því auk leiksins í kvöld stóð Andrea sannarlega fyrir sínu í bikarleik um síðustu helgi þótt frammistaðan hafi ekki nægt til þess að Silkeborg-Voel öðlaðist sæti í átta liða úrslitum.
