Opna Reykjavíkur- og UMSK-mótinu sem átti að hefjast rétt fyrir miðjan ágúst var slegið á frest fram yfir áramót eftir nokkrar bollaleggingar. Ekki var hægt að hefja mótið á tilsettum tíma vegna hertra sóttvarnareglna. Upp kom síðan sú hugmynd að færa leiki mótsins inn í æfingatíma félaganna en hún féll í grýttan jarðveg.
Um skeið var talið að mótið yrði alveg slegið út af borðinu á þessari leiktíð þegar upp kom sú hugmynd að færa mótið fram í janúar 2021. Þar með væri hægt að nýta það sem upptakt fyrir síðari helming Íslandsmótsins meðan keppni liggur niðri í Olís-deild karla vegna þátttöku íslenska karlalandsliðsins á HM í Egyptalandi. Á þeim tíma sem keppni í Olísdeild karla liggur niður eru liðin hvort eð er að leita eftir æfingaleikjum og þess vegna tilvalið að koma á skipulögðu móti.
