Elín Klara Þorkelsdóttir og liðsfélagar í IK Sävehof luku árinu með 14 marka sigri í heimsókn til Kungälvs HK í sænsku úrvalsdeildinni í handknattleik í kvöld, 35:21. Elín Klara lék við hvern sinn fingur í leiknum og skoraði sjö mörk og var með fullkomna skotnýtingu. Eitt markanna skoraði hún úr vítakasti. Elín Klara var markahæst ásamt Stinu Wiksfors.
Leikmenn IK Sävehof réðu lögum og lofum í viðureigninni frá upphafi til enda og voru m.a. með níu marka forskot eftir 30 mínútur, 19:10.
IK Sävehof hefur 20 stig í efsta sæti úrvalsdeildarinnar eftir 11 leiki. Kungälvs HK reka lestina með þrjú stig.
Berta Rut var líka í sigurliði
Berta Rut Harðardóttir skoraði eitt mark í fjórum skotum í öruggum sigri Kristianstad HK á Skuru IK, 33:26, á heimavelli. Kristianstad HK er áfram í níunda sæti deildarinnar af 12 liðum með 9 stig eftir 11 leiki. Skuru er í sætinu fyrir ofan með 10 stig.
