Fyrirliðinn verður áfram hjá ÍR

Hornaðurinn Sveinn Brynjar Agnarsson fyrirliði Olísdeildarliðs ÍR hefur framlengt samningi sínum við félagið til ársins 2027.
Sveinn Brynjar lék 19 leiki með liðinu í Olísdeildinni í vetur og skoraði 49 mörk. ÍR-ingar, sem voru nýliðar í Olísdeildinni, héldu sæti sínu í deildinni en síðasta umferðin fór fram á síðasta fimmtudag.

Sveinn Brynjar er uppalinn í Breiðholtinu og hefur verið fyrirliði meistaraflokks undanfarin tvö tímabil. Þar áður var Sveinn Brynjar lánaður í eitt ár til Gróttu.

„Við ÍR-ingar erum glaðir með undirskrift Svenna og hlökkum til að fylgjast með honum áfram í Skógarseli,“ segir m.a. í tilkynningu handknattleiksdeildar ÍR.