Fyrsti Íslendingurinn í liði umferðarinnar

Janus Daði Smárason, leikmaður Göppingen, er í liði fimmtu umferðar þýsku 1. deildarinnar en liðið var kynnt í dag, daginn eftir að fimmtu umferð lauk. Hann er fyrsti Íslendingurinn sem valinn er í lið umferðarinnar það sem af er keppnistímabilinu, en það eru umsjónarmenn heimasíðu deildarkeppninnar sem sjá um að velja í liðið hverju sinni.

Janus Daði lék afar vel með Göppingen þegar liðið vann Leipzig á útivelli á fimmtudagskvöldið, 25:22. Var það fyrsta tap Leipzig á leiktíðinni. Janus Daði skoraði fimm mörk í leiknum úr fimm tilraunum og átti einnig margar stoðsendingar á samherja sína. Hann kom til félagsins í sumar eftir að hafa leikið með danska meistaraliðinu Aalborg Håndbold um ríflega þriggja ára skeið.