Garðar Ingi Sindrason var hetja FH í kvöld þegar hann skaut liðinu í undanúrslit bikarkeppninnar í handknattleik með sigurmarki, 30:29, fimm sekúndum fyrir leikslok í viðureign við Aftureldingu í Myntkaup-höllinni að Varmá. Þorvaldur Tryggvason hafði jafnað metin fyrir Aftureldingu 16 sekúndum áður en leiktíminn var út, 29:29.
FH var marki yfir í hálfleik, 16:15, og náði fimm marka forystu snemma í síðari hálfleik. Aftureldingarmenn komu til baka og jöfnuðu, 23:23, en tókst aldrei að komast yfir. Taugarnar voru þandar síðustu mínúturnar, lítið var skorað og talsvert um mistök. FH var tveimur yfir, 29:27, þegar fimm mínútur voru eftir af leiktímanum. Einar Baldvin Baldvinsson, markvörður Aftureldingar, hélt liði sínu inni í leiknum með hverri markvörslunni á eftir annarri, ekki síst úr opnum færum. Frammistaðan hans gerði að verkum að Afturelding átti þess kost að jafna metin eins og liðið gerði með marki Þorvaldar 16 sekúndum fyrir leikslok.
Garðar Ingi kórónaði stórleik sinn með sigurmarkinu en hann skoraði átta mörk úr átta skotum.
FH verður þar með í undanúrslitum bikarkeppninnar fimmtudaginn 26. febrúar ásamt Haukum, ÍR og KA. FH var síðast í undanúrslitum bikarkeppninnar fyrir árið 2022 eins og KA. Haukar náðu alla leið í undanúrslit 2024 en ÍR var síðast í undanúrslitum 2019.
Mörk Aftureldingar: Ihor Kopyshynskyi 8/3, Ævar Smári Gunnarsson 6, Þorvaldur Tryggvason 4, Kristján Ottó Hjálmsson 4, Sveinur Olafsson 3, Árni Bragi Eyjólfsson 3, Ágúst Ingi Óskarsson 1.
Varin skot: Einar Baldvin Baldvinsson 12, 34,3% – Sigurjón Bragi Atlason 0.
Mörk FH: Garðar Ingi Sindrason 8, Símon Michael Guðjónsson 7/2, Jón Bjarni Ólafsson 6, Ómar Darri Sigurgeirsson 4, Birkir Benediktsson 2, Einar Örn Sindrason 1, Birgir Már Birgisson 1, Daníel Freyr Andrésson 1.
Varin skot: Daníel Freyr Andrésson 8, 29,6% – Jón Þórarinn Þorsteinsson 3, 23,1%.
Tölfræði leiksins hjá HBStatz.
ÍR-ingar og Haukar í undanúrslit
