„Þetta var skemmtilegur sigur og góður fyrir sjálfstraustið. Enn betra var að geta aukið forskotið í síðari hálfleik, byggt ofan á það sem við gerðum í fyrri hálfleik. Það var frábært,“ sagði Thea Imani Sturludóttir landsliðskona í handknattleik við handbolta.is í Nord Arena í Frederikshavn í Danmörku eftir 23 marka sigur, 37:14, á grænlenska landsliðinu í fyrsta leiknum í keppninni um forsetabikarinn á heimsmeistaramóti kvenna í handknattleik.
„Við gátum rúllað vel á liðinu. Allir fengu að stimpla sig inn sem var afar mikilvægt fyrir framhaldið hjá okkur. Það er ennþá þrír leikir eftir. Sigurinn gefur okkur byr undir báða vængi,“ sagði Thea Imani Sturludóttir í eldsnöggu samtali við handbolta.is þegar hún gekk af leikvelli eftir sigurinn góða.
Næsti leikur íslenska landsliðsins á mótinu verður gegn landsliði Paragvæ á laugardaginn. Flautað verður til leiks klukkan 17. Handbolti.is stendur vaktina í Nord Arena þá eins og nú.
Þórey Anna setti nýtt markamet á HM
Frábær byrjun í forsetabikarnum – stórsigur á Grænlendingum
