Georgíumenn eru komnir í annað sæti í riðli Íslands í undankeppni EM karla í handknattleik eftir annan sigur á fjórum dögum á Bosníumönnum. Georgíumenn unnu á heimavelli, 28:26, á fimmtudaginn og fylgdi sigrinum eftir með öðrum í vinningi í kvöld í Cazin í Bosníu, 22:20. Georgía var einnig tveimur mörkum yfir í hálfleik, 12:10.
Bosníumönnum tókst að minnka muninn í eitt mark, 20:19 og 21:20 skömmu fyrir leikslok en lánaðist ekki að jafna metin. Teimuraz Orjonikidze innsiglaði sigurinn skömmu fyrir leikslok. Hann var markahæstur með sex mörk. Örvhenta skyttan Giorgi Tskhovrebadze var næstur með fimm mörk.
Mislav Grgic var markahæstur hjá bosníska landsliðinu með sex mörk.
Ísland er með átta stig í 3. riðli að loknum fjórum leikjum. Georgíumenn, undir stjórn Tite Kalandadze, fyrrverandi leikmanns Stjörnunnar og ÍBV, hafa fjögur stig, Bosnía tvö eins og Grikkir.
Georgíumenn fá Grikki í heimsókn til Tiblisi 7. maí á sama tíma og íslenska landsliðið sækir bosníska landsliðið heim til Sarajevo. Í lokaumerðinni 11. maí koma Georgíumenn í Laugardalshöll og Grikkir og Bosníumenn mætast í Grikklandi.
