Gísli Þorgeir Kristjánsson hefur skrifað undir nýjan langtímasamning við Evrópumeistara SC Magdeburg. Gildir samningurinn til ársins 2030. Í lok samningstímans verður Gísli Þorgeir búinn að vera hjá félaginu í áratug. Greint var frá þessum tíðindum í gær þegar Magdeburg mætti HSG Wetzlar á heimavelli í þýsku 1. deildinni. Segja má að um snemmbúna jólagjöf sé að ræða fyrir stuðningsmenn SC Magdeburg enda er Gísli Þorgeir hvers manns hugljúfi í þeim hópiþ
Hefur svo sannarlega gert það gott
Gísli Þorgeir hefur svo sannarlega gert það gott á árum sínum hjá Magdeburg þrátt fyrir að hafa glímt við ítrekað mótlæti vegna axlarmeiðsla. Hann hefur tvisvar orðið Evrópumeistari 2023 og 2025 og í bæði skiptin verið valinn leikmaður úrslitahelgar Meistaradeildar. Einnig hefur Gísli Þorgeir unnið þýska meistaratitilinn í tvígang, 2023 og 2024, auk þess að hafa þrisvar orðið heimsmeistari félagsliða með Magdeburg.
Efstir og taplausir
Magdeburg vann viðureignina við Wetzlar í gær, 33:20, og situr eitt í efsta sæti þýsku 1. deildarinnar með 23 stig að loknum 12 leikjum, stigi á undan Flensburg sem leikið hefur 13 leiki.
Gísli Þorgeir skoraði tvö mörk og gaf fjórar stoðsendingar í sigurleiknum gegn Wetzlar. Ómar Ingi Magnússon var markahæstur með níu mörk, tvö þeirra úr vítaköstum. Hann átti eina stoðsendingu.
Elvar Örn Jónsson skoraði fjögur mörk og gaf eina stoðsendingu.
