Grænlenska landsliðið í handknattleik kvenna tryggði sér í kvöld þátttökurétt á heimsmeistaramótinu sem fram fer í Danmörku, Noregi og í Svíþjóð undir lok þessa árs. Grænlenska landsliðið vann landslið Kanada, 17:15, í úrslitaleik undankeppni heimsmeistaramóts kvenna í Norður Ameríku og Karabíahafsríkja í Nuuk.
Þetta verður í annað sinn sem Grænlendingar verða með á heimsmeistaramóti kvenna í handknattleik en 22 ár eru liðin síðan þeir voru með síðast.
Meðal leikmanna grænlenska landsliðsins er Ivana Meincke sem undanfarin tvö ár hefur leikið með FH í Grill 66-deildinni.
Í fimm liða móti sem hófst í Nuuk á mánudaginn vann grænlenska landsliðið allar viðureignir sínar, fjóra leiki í riðlakeppni og síðan úrslitaleikinn við Kanada í dag sem var í annað sinn sem liðin mættust á mótinu.
Mexíkó vann Kúbu með tveggja marka mun í leiknum um bronsverðlaunin, 29:27.
Tvö boðsbréf bíða
Þar með hafa 30 lið tryggt sér sæti á heimsmeistaramótinu. Tveimur sætum er óráðstafað og kemur það í hlut stjórnar Alþjóða handknattleiksins að senda tveimur þjóðum boðsbréf. Handknattleikssamband Íslands sækist eftir öðru boðsbréfinu. Óljóst er hvenær boðsbréfin verða send út en vonir standa til þess að það verði í síðasta lagi upp úr næstu mánaðamótum.
Dregið verður í riðla heimsmeistaramótsins í Gautaborg 6. júlí.
