Handknattleiksmaðurinn Arnór Snær Óskarsson leikur undir stjórn Guðjóns Vals Sigurðssonar hjá Gummersbach í Þýskalandi til loka keppnistímabilsins sem stendur yfir. Gummersbach segir frá þessu í tilkynningu sem birtist eftir hádegið í dag.
Arnór Snær er samningsbundinn Rhein-Neckar Löwen en hefur fengið takmörkuð tækifæri enda einn fimm örvhentra leikmanna liðsins. Á móti kemur að Gummersbach þarf á liðsauka að halda á hægri vængnum í sókninni. Félögin náðu þar með samkomulagi í gær um leigu á Arnóri Snæ út leiktíðina en á miðnætti var lokað fyrir félagaskipti í Þýskalandi.
Arnór Snær gekk til liðs við Rhein-Neckar Löwen á síðasta sumri eftir að hafa slegið í gegn með Val í Evrópudeildinni á síðustu leiktíð.
Auk Guðjóns Vals þjálfara er Eyjamaðurinn Elliði Snær Viðarsson fyrir í herbúðum Gummersbach. Reiknað er með að Arnór Snær verði í leikmannahópi Gummersbach í næsta leik liðsins gegn Leipzig á heimavelli á mánudaginn. Gummersbach er í sjöunda sæti þýsku 1. deildarinnar.
