Guðmundur Bragi Ástþórsson, leikmaður Bjerringbro/Silkeborg skoraði sjö mörk, öll úr vítaköstum og var með fullkomna nýtingu, í úrslitaleik dönsku bikarkeppninnar í dag í Jyske Bank Boxen í Herning. Bjerringbro/Silkeborg tapaði úrslitaleiknum fyrir stjörnum prýddu og sterku liði Aalborg Håndbold, 34:29.
Álaborgarliðið tók leikinn föstum tökum strax í upphafi og var með sjö marka forskot að loknum fyrri hálfleik, 18:11, að viðstöddum 9.500 áhorfendum. Aalborg Håndbold varð síðast bikarmeistari fyrir fjórum árum. Þetta var þriðji bikarmeistaratitill félagsins.
Guðmundur Bragi varð næst markahæstur leikmanna Bjerringbro/Silkeborg. Peter Balling skoraði átta mörk og var markahæstur eins og í undanúrslitaleiknum í gær.
Thomas Arnoldsen var markahæstur hjá Aalborg Håndbold með sjö mörk. Jack Thurin var næstur með fimm mörk. Aleks Vlah, Kristian Bjørnsen og Sebastian Barthold skoruðu fjórum sinnum hver.
